स्वातंत्र्यवीर सावरकरांचे जीवन. सागर, आकाश यांची उपमानं थिटी पडावीत असं ते विशाल जीवन. मृताला संजीवन देणारं वक्तृत्व, महाकवी कालिदासाशी स्पर्धा करणारी प्रतिभा, आर्य चाणक्यासारखी राजनीतिज्ञता, हिमाचलासारखं उत्तुंग व स्थिर ध्येयवादित्व, मेरु पर्वतासारखं अविकंपित धैर्य, अद्भुत काव्याला सुद्धा अद्भुत वाटावं असं साहस नि धैर्य, राष्ट्रजीवनाच्या प्रत्येक अंगाच्या उभारणीसंबंधी मार्गदर्शन करणारी क्रांतदर्शी प्रतिभा, द्रष्टेपणा, महायोग्याचा संयम आणि.... आणि रोमांच उत्पन्न करणारं हौतात्म्य. असं ते तेजस्वी जीवन, त्या तेजांनं डोळे दिपतात, मस्तक झुकतं नी आपण आदरानं म्हणतो "हिंदुहृदयसम्राट सावरकर, स्वातंत्र्यवीर सावरकर". होय, शिवाय स्वातंत्र्यरवी सावरकर त्या स्वातंत्र्यवीराला अर्घ्य देऊया.
स्वतंत्रतेच्या वीरा, तुजसी कोटि प्रणाम,
तुज कोटि प्रणाम ।। धु.।।
तू तेजस्वी, मार्तण्डासम
बलसागर त् वायुसुतोपम
मृत्युंजय वीरा, भास्वरा विनम्र होती किती अनाम!१
ज्वलंत ज्वालामुखी भासशी
रणसिद्धान्ता ठाम मांडशी
सोनेरी पानांच्या द्रष्ट्या, जरि झालासी तू बदनाम!२
तुझिया देशी तुझी उपेक्षा
तुवा न धरली एक अपेक्षा
तू निरीच्छ, तू दधीचि दुसरा आणु कोठुनि तुज उपमान!३
तू कर्णाहुनि उदार दाता
लाजविले मृत्युला मरता
आत्मार्पण तव विस्मित करिते जीवन धन्य नि मृत्यु महान!४
रचयिता : श्रीराम बाळकृष्ण आठवले
काव्यमय सावरकर दर्शन
No comments:
Post a Comment