किती पवित्र दिवस होता तो. सावरकरांची आराध्यदेवता, अष्टभुजा भवानी देवी आज येत होती. त्यांची कुलस्वामिनी घरी येत होती - शक्तिदायिनी घरी येत होती.
बालविनायकाच्या भावनांना भरतं आलं होतं. झांजांचा झणत्कार झाला, ताशेवाजंत्र्यांची झुंबड उडाली. गुलाल उधळला नि दीप उजळले. शिंगाची ललकारी घुमली आणि त्या निनादात कुलस्वामिनी आली- अष्टभुजा घरी आली.
शिंगाची ललकारी घुमली कुलस्वामिनी आली,
अष्टभुजा घरी आली!ध्रु
सृष्टी हिरवा शालू ल्याली, आमराई ही प्रसन्न हसली
शिंग ऐकता बाहु स्फुरती, उतरे नेत्री लाली!१
अंगांगी चैतन्य संचरे, पूर्वकालि मनविहंग विहरे
झांज झणझणे, घुमत चौघडा, मन रंगे वैभवकाली!२
सीमा सगळ्या उल्लंघाव्या, अश्वांच्या टापा वाजाव्या
रणचंडीचे मिळुनि आवाहन, गर्जत जयमहाकाली!३
दांड्यांची व्हावीच पालखी, लक्ष्मि रहावी हसत सारखी
येईल का गतवैभव फिरुनी, उत्सुकता आतुरली!४
देवीचा जयघोष चालला, स्मृति सुगंध चित्तात कोंदला
चित्र जसेच्या तसे राहिले, नित्याचे हृत्पटली!५
भवानि माते शस्त्रधारिणी, अयि दुर्गे तू अभयदायिनी
दे तव शौर्या, अतुलहि धैर्या - सांप्रत संकटकाली!६
रचयिता : श्रीराम बाळकृष्ण आठवले
काव्यमय सावरकर दर्शन
No comments:
Post a Comment